Hàte
Hen iha agé way pammaten hen iFarangao wat mepanggép hen hàte. Mag-ay ta cha tomam-ang hen ihay tagu hen ihay faréy yag wachan hommàte hen anchichay fumaréy, hen ekaman ano anchi tagu way cha hénggép wat tènarana anchichay fumaréy way mangaliyén, “Ayongman! Tagat lawag wachay seblotyu te nokagén anà paat ancha umchah yag hommàte-ayu?”
Hen manènaran ano anchi tagu way cha hénggép hen anchichay fumaréy wat ta achi ano metoroy way ma-ammaan hen laweng way ma-ammaan an hiya. Yachi ta achi man-anchar hen henoy laweng.
Hen iha agé wat no wacha cha lumigwat yag wacha hommàte, masapor éyténa way lumigwat yag man-itùchuna ta awni yag anat kasen lumigwat ta achi ano ma-ammaan agé hen itchun anchi hàte. Anchi itchun ono itchu wat anchi kagé man-ancharan hen anchi hàte. Wat chanaha hen iha way epangég hen tatagu te afigancha amin chanaha. Te hen anchichay a-anap-o ad namenghan wat chacha intudtutudtuchu hen a-anàcha way masapor obserbarén amin chanatto.
