Anat ano cha Fatnog an Kemay way hen-agi, incha ano nanguma hen hen-argawan yag nantenê-énén ano inacha hen hangaAtcha. Angkay ano inumchahcha ah wangwang, ekat ano Fatnog an Kemayén, “Manguma-a Kemay ahtod chaya ta haén ad lagud.” “Okaỳ” way ekat ano aman Kemay. Yachi yag émméy ano ah Kemay hen anchi tagéytéy yag nadchi hen ninlugiyanay nanguma. Waman ano ah Fatnog, émméy iggaw yébyéb ad lagud way penget hen wangwang. Inumaan ano Fatnog hen hen-aggang yag lommayugat ah wangwang way i nanarép ta wacha manichana hen anchi hangatna way kaman utteng. Yachi ano way natchù anchi harépna annat tomtoman anchichay gachiw yag intomna ano anchi henarpana yag anat mangan way cha-anna ayagan ah Kemay ad chaya way sonodna. Yag gapoh finhugna, annag inchupag ano way masséy iggaw tarantag. Angkay ano agé ah Kemay, annag empapate way nanguma wat chakar anchi inuma-ana. Yachi ano way cha madhém, way chug-ohona koma ah Fatnog maid te wachah wangwang wat inchahan ano Kemay hiya ah wangwang. Ekat ano Kemay an Fatnogén, “Epangpangom Fatnog ta man-améhà unna.” Yachi wat empangpangon ano to-owa Batnog. Angkay tég-angay umchah hiya ah faréycha, anna anog finàwar hen pongar anchi fufurong iggaw charan wat nabfuchufuchu way ommanamot. Inumchah ano iggaw égtaréncha yag ekatna anowén, “Ina, wino ay lawa ta pòpoam antoy achar-o te ammag amchan hen fuchu.” Anat ano tot-owa aran inana hen anchi lopot wat émméyna penòpoan hen échég Fatnog.
Angkay yachi ano way ommanamot ah Kemay yag tummùchu iggaw chinarangan ah chara yag cha ano epahibhib-at inacha way mangaliyén, “Ananay eman hea anna Kemay ta an-ag cha-an i nanguma te cha-an nabfuchu hen annay acharno?” Ammag gumiginnang ano ah Kemay way cha-anna songsongfatan anchi enalen inacha. Yachi way nafigat, ammag markawat ano eman hen hangat Kemay way ensaganan inacha yag isna paat an Fatnog. Ammag yachiyachi ano ah finigafigat wat ammag achi cha anén Kemay hen hangatna wat nan-amma ah uyunna way chana manot-olloan hen anchi markawat way hangatna. Yachi wat ammag chakar way térén hen uman Kemay yag ah Fatnog an-anog hen-ò-orong yag yébyéb pay agé. Angkay nanheorcha ammag cha-an issan hen apoy anchi uman Fatnog te yébyéb, waman ah Kemay ammag henemhemotan ano hen apoy anchi umana wat ammag aket hen léhangna.
Angkay tégangay ano hen ahehamar, chinuar ano Angnganay hen inilìna ta ehamarcha ano iggaw uman Fatnog. Angkay ano tot-owa hen anchi ag-agaw way manhamrancha, teneplag ano inacha hen kaman utteng way hangat Fatnog yag anlawa farat an Kemay. Ammag cha ano-anohan ano eman Kemay hen yachi way ligligatna isonga anchag cha mascha-aw anchichay tatagu way cha mangila an hiya te cha maurat. Yachi yag inligwat ano cha Fatnog an inacha ta incha hamrén hen umana. Angkay ano inumchahcha hen anchi wangwang, innilan inacha way ammag ummumraw anchi harép te kanayun way maharép. Yag ekatna anowén, “Chuud hen umam ta intaat hamrén.” Yachi yag empangpangon ano Fatnog yag inumchahcha iggaw umana yag entàchégcha, ekat ano inachéén, “Ananay, ananay eman hea Fatnog ammoh mafalin tot-owa way mahamarha way ammag amchan annay léhangna yag uray non umat wat ammag pengay yanggay hen mehamar. Nafaros-a lawa anna, ammag chatan chinachinar way wacha mangenhamran hen antoy chuar way ilì te ekatén chakar hen inuma-am yag an peet hen manarép yanggay hen cham am-ammaan ah manicham hen kaman utteng way hangatno?” Ammag pararo hen aningarngar inacha an Fatnog.
Angkay ano agé eman ah Kemay, anna lawa kattég tenomtoman anchichay ilì way nàchag hen charan te iggay adchan inacha ah ehamarna. Yachi wat annag cha hininnih-a ano eman way nenhamar anchi ilì way tenomtomana. Angkay hen anchi cha lomta-an hen henamar Kemay, ammag chan totokar te an anog gufuy hen anchi cha lomtà yag pagéy hen anchichay haragpatna. Uray ano anchichay haragpatna wat anchag mascha-aw te pagéy hen anchi enhamar Kemay ngém ammag gufuyat agé anchichay lenomtà. Yachi ano wat uray yag linugman Kemay hen anchhi umana te ekatnéén, “Uray kagé yag linugmà hen henamar-o anto ta maila no nokay mekaman te pakay ammag magénén yato hen mekaman.” Yachi ano way chan lugrugam hiya, anchag fummùnagat agé anchichay tokag yag ekatchéén, “Kemay, ay wacha tapen lanchùno ta toronganni hea?” “Maid” way ekat ano Kemay, “wat uray kagé paylawa antoy fangid-o hen usarényu.” Yachi yag ancha anog penpentén hen anchi fangid yag anchag kakanekaneskes ano way manlugam yag narpasat way nalugman hen anchi chakar way uman Kemay. Yachi yag ekat ano anchichay tokag an Kemayén, “No masaporno hen torongni wat annog ongawan chàni wat umaleani way manorong an hea.” “Okaỳ” way ekat ano Kemay.
Angkay hiyachi way inumchah hen ahibtà, ammag chan ngangaya ano ah Kemay way éméy ah umana te ammag afalfalletang ano hen fungan hen gufuy iggaw umana way ammag chachanakkar ano. Uray anochi yag ekatnéén, “Iyà éggay lawa ilan no henokay hen mabtà hen anchi umà.” Angkay ano inumchah ah umana, chana ano gatan anchi penget hen afongna yag nafa-agat agé hen iha anchi fungan gufuy yag niwahetat agé hen fégah. Ekatna ano ah hamhamànén, “Nokagé eman hen i ninwahet ah fégahna annatto?” Chana ano etoroy way man-gaat yag kasen ano nafa-ag hen iha yag innilana way anchi nafa-ag way gufuy hen narpowan anchi fégah yag enag-aggagna ano way namogah hen iha yag tenongrafana yag fégah hen wachad char-ém, ammag lommaylayad ano hiyay térén te achi peet maligatan way manfayu te nafafayu hen pagéyna. Yachi ano yag annaat ongawan anchichay tokag way mangaliyén, “Chàyuy kakayakayagsang, umaleayu ta manfatà-taaw.” Yachi yag chachaat ano tot-owa fùnag anchichay tokag hen penget anchi uman Kemay. Yachi wat ammag hen-awniyan ano wat penorahchaat amin anchichay fungan hen gufuy. Cha ano eman ifagan Kemay hen anchichay tokag ta umaracha hen anchi penorahcha ah anéncha ngém ekatchéén yasa te chuar hen umù way chacha an-anén ah pagpag.
Angkay ano hen-argawan, namin hen anchi kamana yanggay way la-ém way fintà Fatnog iggaw umana wat maichat anéncha. Chacha ano mafinan way éméy an Kemay way man-ochaw ah anéncha karkaro ah inacha te hen anchi enkamkamanna an Kemay hen anchi ar-argaw. Ngém yachi ano way pirmi hen henaangcha te kamanay ag-agaw way cha-ancha nangnangan, ammag pelet way i man-ochaw ah Fatnog an Kemay ah anéncha. Incha nanpangpanga-ase an Kemay wat penangan Kemay chicha. Yachi yag wachaat ano hen ihay am-ammay way kasole way ammag pommatang iggaw afong Kemay yag ekatna anowén, “Wino Kemay ta pomatang-a hen antoy payà-o ta éméy-o igégga-ay hea ah tapen chi lota.” Yachi ano tot-owa yag i pommatang ah Kemay hen anchi payà anchi kasole yag ekatna ano ancha inanéén, “Ina, inyungén ilan hen annay uyun-o ah chu-ug.” Yachi yag tommayapat anchi kasole wat penalemohan cha Fatnog an inana. Yachi yag émméy ah inacha ah chu-ug yag innilana anchi uyun Kemay way ammag napno ah markawat yag chan kela gapo hen anchi enam-amma-ana an Kemay hen anchi narpas way ag-agaw. Uray kagé no pararo hen fafawina ngém looh narpas yag maichat ah Kemay way anàna te lommayaw.
Angkay ano ah Kemay, inyéy hen anchi kasole iggaw fabréy way am-ammay yag ahchi hen nangil-ana an Ekkafaw yag annaat ahaw-én.
Anggaychi!
