Ad namenghan ano, wachan ihay tagu way Pettogangnga hen ngachanna. Hen-argawan ano émméy nangawéy yag angkay ommanamot ammag maichat agé ah inana. Yachi yag annaat ano éméy imohon iggaw atògongcha yag ekatcha anowén, “Ané maid angkay ah inam te enlayaw fuwaya ad anad.” Yachi ano yag ammag chan kela ah Pettogangnga yag chan hamahamà no henokay hen ekamanna. Yachi yag ekatna anowén, “Unuchù yanggay ah ina uray chuud nangényéyan fuwaya.
Yachi ano yag anat iligwat Pettogangnga way manwangwang yag inchahana anon faréy Korteng yag i tummùchu iggaw orchan. Ekat ano Kortengén, “Henon chan lètalègtag orchan-o way awayan,” “Haén ah Pettogangnga un-unnuchù ah inay enlayaw chi fuwaya” way ekat ano Pettogangnga. “Wino ta manganta unna” way ekat ano Korteng. “Nokay issata nò?” way ekat ano agé Pettogangnga, “ané korteng kagé” way ekat ano Korteng. Yachi yag nèan ano ah Pettogangnga.
Yachi yag anat ano kasen iligwat Pettogangnga way manwangwang yag inchahana ano hen faréy Fanggaran yag i ano agé tummùchu iggaw orchan. “Henon chan lètalètag orchan-o way awayan,” way ekat ano Fanggaran, “haen ah Pettogangnga un-unuchhù ah inay enlayaw chi fuwaya” way ekat ano Pettogangnga. Yachi yag anat ano ayagan Fanggaran ta mangancha unna. Ekat ano Pettogangngén, “Henokay issata nò?” “Fanggaran kagé,” way ekat ano agé Fanggaran. Yachi wat nèan ano agé ah Pettogangnga.
Angkay narpascha anoy nangan, inimoh ano Pettogangnga no innilan Fanggaran way enlooh fuwaya ah inana. Ekat ano Fanggaranén, “Ané ad hin-uchum nangenlohana no ay yachi peet hen inam.” “Yachi ngarud,” way ekat ano Pettogangnga “ta unuchù chicha.”
Yachi wat nanwangwawangwang ano ah Pettogangnga yag inchahanan faréy Chalet yag enlèlètagna ano chillun orchan Chalet yag anat ayagan Chalet wat nangancha unna yag anat sarudsuchun Pettogangnga no ay inilan Chalet nangenlohan fuwaya an inana. Ekat ano chaletén, “Ad ugga hen cha madhém hen nangenlohana no yachi peet hen inam.”
Yachi yag inligwat ano agé Pettogangnga way kasen manwangwang yag inchahana ano tot-owa hen anchi ammag ang-angngéngét way po-ong yag annaat ano itùchu yag ekatna anowén, “Fuwaya, fuwaya fùnag-a ta uminumta fayah-oy ginumuwan pagadchilun iyokan.” Yachi yag fummùnag ano tot-owa hen ihay fuwaya yag penainuman ano Pettogangnga yag nafutang yag annaat pédtén. Kasenna ano ekatén, “Fuwaya, fuwaya fùnag-a ta uminumta fayah-oy ginumuwan pagadchilun iyokan.” Yachi yag nafinùnag ano agé hen iha yag penainumana ano agé wat nafutang yag annaat ano agé pédtén. Ammag yachiyachi ano hen chana ekamakaman ingganah ommanongoh ano anchi chakar way lae way fuwaya wat pinchit ano chillu Pettogangnga.
Yachi yag ammag maichat fùnag ah fuwaya yag anat ekat Pettogangngéén, "Namincha ménat tot-owa wat iyà ilan ah ina." Yachi yag anat lémtép ad char-ém yag yag émméy igggaw chakar way liyang ad char-ém yag inchahana ano hen fuù inana way chan tap-tap-aw yag annaat ano eman aran yag iniggana iggaw fà-a.
Yachi yag anat manmuma ah Pettogangnga yag finug-esana ano anchi fuù inana yag ekatnéén, “Ina fangon-a ta omanamotta.” Yachi ano yag nanfalin ah kaman toyyang anchi ininggaw hen fàa. Yachi yag kasen nanmuma ah Pettogangnga yag kasenna finug-esan yag tummùchu ano anchi ininggaw hen fàa. Yachi kasen ano chillu nanmuma ah Pettogangnga yag finug-esana ano kasen yag tommàchég. Yachi yag anchi ano anongoh namug-esana an inana wat nanfangad anchi ustoy itchuran inana yag ammag kaman ano naégyay way mangilan Pettogangnga yag manlettagang way mangila no wachah fuwaya. Yag ekat ano Pettogangngén, “Intaat ina, achia machanagan te pinchit-o amin hen fuwaya hen hiyato way po-ong wat intaat ta omanamotta.”
Yachi yag anchaat ano omanamot yag anchag nascha-aw anchichay atògongcha te iggay peet inissan fuwaya ah inan Pettogangnga. Yag anat istoryéén Pettogangnga hen anchi nekamkaman yag anchag mang-éy ano anchichay tatagu ah kenatorod Pettogangnga way i nangara an inana.
Anggaychi
