Ad namenghan, hen ekat hen tataguwén AFAT wat no henoman hen cha ammaan hen ihay tagu way fufae man ono larae ya uray onga yag ammag pàrat way mansigab hen potona wat yachi hen ekat anchichay natnatangén, “Aẁ an angkay nànaha ah afat.” Yachi wat arancha hen chuyug way tarwanchah chanum ya senor-at ono fugta yag anchaat man-afu-ab way wachan chacha aryé-aryén way mangenhapod.
No maid innilan anchichay ifan anchi tagu way mangafu-ab wat incha kagé man-anap ah nangila way mangenhapod ah Afat. Wat no umale hen anchi mangenhapod wat sarudsuchuna no heno hen cha ammaan anchi tagu yag anat mansigab hen potona. No ay an chan fayu, ono cha mangan, ono chan chunu ah payaw ono heno laway chana ammaan.
Hen manarudsuchan anchi mangenhapod no nokay hen cha ammaan anchi nànah afat yag anat mansigab hen potona te yachin mangenpongarana way mangafu-ab. Way ekatna kagén, “Heay afat chi finayu, ono ub-ufun..” ono heno way cha ammaan anchi tatagu way na-afatan wat yachi hen mangenlapowancha anchi afu-abcha. Yachi wat no afat tot-owa wat maka-an hen sigab hen poton anchi tagu. Yaha hen ihay pammaten hen tatagu ad namenghen panggép hen afat.
