Ad namenghan ano, wachan hen-agi way cha Tallifako an Tannifan. Ulilacha hen antoy hen-agi te anakettoycha yag natéy cha amacha an inacha. Hen anchi kawad-an hen aket way pagéycha, anchag laylayad ano anchichay o-oletaocha ya a-anticha wat chachan ep-epérréh way mangayuwan anchi hen-agi. Ngém angkay yachi way namin amin anchi pagéycha, ammag maid ano manlayad way mangayag an chicha wat anchag achi pagan-ano chicha. Yachi ano wat anchag ommanggay way hen-agi.
Hen-argawan ano, ammag naség-angan anchi atògongcha wat enayagana chicha way i manfallat ah umacha ta labfuwana chicha ah pagéy. Yachi wat émméycha ano tot-owa way hen-agi way nèfallat ah ihay ag-agaw. Yag enadchan anchi atògongcha chicha ah chuwanlaém way labfucha. Angkay nanlooh hen ihay ag-agaw, ekat ano Tallifako an Tannifanén, “Inta Tannifan ta inta manaychù ta manichata annay labfuta.” “Okaỳ,” way ekat ano Tannifan. Wat inligwatcha ano tot-owa way i manaychù.
Angkay inumchahchah wangwang, ah Tannifan ano hen mamangchén hen utnorcha wat ah Tallifako ano hen cha manayhaychù. Angkay ano cha fumatangan, napno anchi fugguwangcha yag ekat ano Tallifakowén, “Intaat Tannifan te napno met annay miggaanta.” “Oo kagé” way ekat ano Tannifan. Angkay ano chacha omayat iggaw fato, ammag nichangleh ah Tannifan way nanangchén anchi utnor yag nahòwap hen hoap anchi utnor wat ammag niwahet anchi henaychu-ancha wat anchag naorarug ad lagud. Ammag ommaningarngar ano ah Tallifako te ommawà way nanaychù yag ammag niwahetat agé. Wat gapoh aningarngarna wat enhaprahapratna an Tannifan anchi haychù way iné-égnana. Yachi wat chan kela ano eman ah Tannifan wat nanggat te cha-anna ginagara. Yachi wat inligwatnay mamangpango ah fabréy.
Angkay ano cha manad-aran, inchahana hen chuar way pàpa-o, ekatna anowén, "mamàpaowà lawa ta wachay issà ah awni te awniyat achiyà adchan an Tallifako no wachay arana ah gachiw." Yachi ano way cha mamàpa-o, no ketengéna anonchi pàpa-owén wachan manliyéh way changréna. Angkay ano ta manlangrangén maid ilana ah tagu wat ammag cha émégyat te ekatnaat magat ano fanig. Yachi yag entoroyna way umarah pàpao yag yachi ano chillu way no kometeng ah pàpaowén wacha hen manliyéh. Wat gapo hen égyatna ammag i nantaro ano iggaw pongar hen pàpao. Yachi ano yag wacha agén gonggongay iggaw natarowana, yag ammag nan-aleyat ano anchi gonggongay way mangaliyén, “Achia cha émégyat.” Managtag koma ah Tannifan ngém gapoh égyatna hen anchi chan ale way gonggongay ammag achi makaligwat. Yag kasen ano nan-ale anchi gonggongay way mangaliyén, “In-aat aran anchi tufun hen arantap way nag-ah way chakar ta epagpagno yag inyalem ta tarwà ah aném.”
Yachi wat enafurot ano Tannifan wat émméyna inara hen anchi tufun hen arantap. Empagpagna ano yag tummùchu. Yag ah gonggongay ano inarana anchi tufun arantap yag cha umutlà yag hen anchi chana ano iyutlà wat che-at way enanchila way chan fangu ano te larag hen nigga. Tenenétnan ano anchi gonggongay hen érégnah anén Tannifan yag ensarchengna way umutlà yag ekatna anowén, “Anémha te ammù way hommenaang-a.” Yachi yag enaenan ano tot-owa Tannifan anchi che-at yag anat ano kasen ekat anchi gonggongayén, “Ayé aram annay tufun hen awéy ta oppeopanà ta ehàyatà ah fabréy ta chà umut-utlà ah anényuy hen-agi te kàka-aseayu. Yag no homàyatta ah fabréy, hàufanà hen anchi panayyu ta chà umut-utlà ah anényu way hen-agi.” Yachi wat enafurot ano tot-owa Tannifan anchi gonggongay wat enhàyatna.
Angkay enhàyatna, henàufana anchi gonggongay te yachi hen filinna yag i tummutùchu ingganah cha mepatang ah init yag hommàyat ah Tallifako yag chana kasen ano ingarén ah Tannifan. Ekatna anowén, “Pakay an-ag tumutùchu amin naha yag achi-aat mansor-at?” Yag ekat ano Tannifanén, “Achi masapor mansor-at ya antaat mangan.” “Wat heno anon anémanna no achia mansor-at? Annog hensadsachoton lawa anna,” way ekat ano Tallifako. Yachi yag hinénggépcha ano yag ekat ano Tannifanén, “Ay umara-à ah aném no hommenaang-a?” “Oo” way ekat ano Tallifako “no chuud umar-am anna”. Yachi yag i ano entayan Tannifan hen penggan an gonggongay yag ummutlà yag napno hen anchi penggan ah che-at way inyutlà gonggongay. Yachi yag nanganangan ano ah Tallifako wat nabhug. Ekatna anowén, “Nokay eman nangar-am annay gonggongay way magénén cha umutlà ah che-at?” Yachi yag anat istoryéén Tannifan anchi nekaman way nangar-ana anchi gonggongay. “Cha maka-aseyan an chita” way ekat Tannifan isonga inyanamot-o te laychénay iyanamot-o ta cha ano umut-utlà ah chata an-anén.” “Wat ammay kagé” way ekat Tallifako no yahan nekaman.”
Yachi ano way ihay furan ménat ano way maid ém-émméy an chicha ah faréy cha Angnganay way oletaocha yag ekat ano Angnganayén, “Henoman hen émméyan cha Tallifako an Tannifan ta chacha lawa manfayu?” Ngém hen chana peet ekaman no mamfayufayucha ta tég-angaycha mangan, chana ano eparyaw chicha wat ammag nattelég cha Tallifako way hen-agi. Yachi yag émméy ano ah Angnganay ah faréycha Tannifan yag chachaat agé mangan way hen-agi yag innilana ano anchi chacha anén yag ekatna anowén, “Nokay eman chayu anén anna?” “Che-at” way ekatcha ano yag hinénggép ah Angnganay yag nè-an. Yachi yag ekatna anowén, “Nokay eman émméyyu nangar-an heto te nongay anyu enakaw?” “Faén aya te annay gonggongayni hen cha minyutlà” way ekatcha ano. “Chuud ay hena?” way ekat ano Angnganay. Yachi yag yinahyahancha ano anchi gonggongay way nempàila. Yag ekat ano Angnganayén, “Ayé ta furuchù ta iyà agé epautlà ah anén agé Gummuwang way apenghanyu.” Yachi wat inidchatcha ano.
Angkay ano cha madhém way éméy koma aran Tannifan, ekat ano Angnganayén, “Maid te entap-ar-o wat nagpes te ummutlà yag ammag attay hen inyutlàna.” Wat annayan hen gùangna ah chara.” Yachi yag émméy ano eman tenomtoman Tannifan anchi gùang gonggongay yag inyéyna ah faréycha yag enhàfana. Angkay ano nadhém, nanfalinat ano anchi gùang gonggongay ah gimata. Wat émméy ano ad Faliwén way nan-ufu ah pagéy wat pennona ano anchi chuway arang cha Tannifan. Angkay ano agé innilan Angnganay way oletaocha, ummapés agé yag ekatna anowén, “Henon émméyyu nangar-an hen pagéyyu way maid met inyammayu ah pagéy? Pakay magénén ammag cha mapno hen chuway arangyu aya? Magat anyu enakaw?” Yag ekatcha anowén, “Achi-ani ay cha mangakaw te annayan ang hen gimatani way émméy nangara.” Ekat ano agé Angnganayén, “Iyaleyu ngarud ta furuchù ta éméy agé umara ah pagéy Gummuwang way apenghanyu.” Yachi yag inidchatcha anugu. Yachi yag émméy ano ummara anchi gimata ah atubfi wat pennona hen arang cha Angnganay ya uway ah fiu. Na-aningarngar ano ah Angnganay yag annaat agé érnén yag entongona.
Angkay nawakas way éméy aran Tannifan anchi gimata, maid te enlén Angnganay yag ekatna anowén, “Enlén-o te émméy ummara ah atubfi wat annachayan hen atubfi ah apichang way entap-ar-o.” Anat ano hénggép ah Tannifan yag éméyna ano innara anchi hempattuchu way ngopoh anchi gimata yag inyéyna ah féréycha. Angkay nadhém, naligwat agé anchi ngopoh hen gimata yag émméy ad Sabela wat émméy kommararaw ah manò ancha fafuy. Angkay pommawéy ano ammag maid kagag-awaanchi fafuy ancha manò ah fatawancha Tannifan way étégchay na-u-ubfi. Innilan agé Angnganay yag ummapés ano agé yag ina chillu finurud. Ammag safag ano ya namorò hen anchi inyanamot hen kararaw ya ufi wat angkay fùtancha anugu hen nafigat anchag ahewewek anchichay namorò way ommawid ya ahetatayap anchichay safag. Kaskasen ano way na-aningarngar ah Angngnay yag annaat agé ano aran anchi ufi ya kararaw yag entongona. Angkay ano éméy aran Tallifako, ekat ano Angnganayén, “Maid angkay te entongò te ammag i ummara ah namorò ancha safag yag anchag ommawid amin hen nam-atanni.” Yachi yag anat ano aran Tallifako anchi ngopohna way anakettoy yag inyéyna ah farérycha.
Angkay nadhém ano, nanfalinchaat agéh te-or yag émméycha agé ad Faliwén way incha hehahabrot hen fafaréy anchichay iFaliwén wat nanhabrotancha ah halepponcha way wacha ay farwase ancha petaycha way namunga. Pommawéy agé ta ilancha yag maichat agé anchi teorcha te inyanamotnah féréycha Tannifan an Tallifako. Angkay agé ta inusarchachi, ummapés agéh Angnganay way oletaocha yag émméyna agé chillu finurud. Yag an ano chillug atubfi way natollotollò hen inyanamotna. Yachi wat ommaningarngar ano agé ah Angnganay yag annaat agé etongo anchi te-or. Angkay éméy agé aran cha Tannifan, maid te entongon agé oletaochay Angnganay. Yachi yag inaracha agénchi ngopohna wat namfalin ah tabra way chuwa. Yag émmeycha ad Sabela hen hiyachi lafi yag ekat ano anchichay finafallu ad Sabelén, “Aỳ eman antoyan hen churong way ammag iyaw yag chan fangu. Yato hen ém-émfégantaaw ayong.” Yachi wat inémfégcha ano hen chuwa way nan-aham-an yag nasséycha yag entayap ano anchi churong chicha yag inyéyna chicha ahchi faréycha Tannifan an Tallifako wat chanadchi hen nan- ahawacha.
Angkay ano innilan agé Angngangay anchichay ahawacha yag ummapés ano agé wat inna agé finurud anchi churong ta éméy umarah man-ahawan Gummuwang. Yag yachi ano agé yag ammag natéy way lommachag hen émméyna innara yag yachin inyanamotna ah faréycha Angnganay. Yag ommaningarngar agé ah Angnganay yag annaat iyam-amma way mentongo anchi churong wat maid poros akettoy ah nataytaynan. Yag yaha hen péppégna.
