Anat anoh selay, hen-argawan ano, émméy iggaw hen po-ong yag innilana cha chagga an aggama. Yachi wat an-anog chan ok-okrong way mangi-ila an chicha te hommenaang yag chana pachasén way manokmà an chicha ngém achi makachokmà te chacha omawid yag pararo umpay hen henaangna. Yachi ano yag anat manhamhamà ah ekamanna. Annaat ano fib-iliyan chicha yag ekatna anowén, "Intaaw aggama an chagga ta intaaw mangagit ah filig." Yachi yag ommafun ano cha chagga an aggama wat inligwatcha way éméy.
Yachi ano yag inlugichay mane-ed ah filig, yag chacha ete-ete-ed ingganah inumchahcha iggaw paen-enagit. Yachi ano yag ekat selayén, "ayé aggama hea hen mangayat annay agit te annayan hen sepetno way mangértangno anchi laheng hen agit." "Okaỳ" wat ekat ano aggama. Yachi wat ommayat ano tot-owa ah aggama yag inna enértaértang anchi laheng hen agit. Yachi ano yag ammag nehànget hen aggifayna iggaw alloy wat ammag nawakkang ano yag nàchag wat natéy ah aggama. Yachi wat ammag laylayad ano ah selay ah hamhamàna te wacha hen issana.
Yachi yag annaat ano ekat an selayén, "Ayé kaya hea chagga hen omayat te annayan hen gùangno wat achia mapagatan." "Okaỳ" way ekat ano chagga. Yachi yag ommayat ano tot-owa eman ah chagga. Yag ah selay nan-esakmornaat ano ah aggama te pirmi umpay hen henaangna. Angkay ano agé ah chagga, cha omagginawa way omayat iggaw awéy yag ammag na-alloyan ano agé anchi fagangna yag cha omaliwadchang ta maka-an koma anchi alloy ngém neparég anchi limana way na-alloyan yag kaskasen way cha omaliwadchang yag ammag nafur-iyat ano anchi limana wat nàchag ah chagga yag natéy. Yachi wat ammag kaskasen ano hen ladsak selay te chakchakkar ah issana.
Yachi ano yag annaat ilugi way mangissa an chagga ingganah namin wat ammag nichugah hen finhugna. Yachi wat gapoh finhugna, annag inyasséy ano iggaw pongar hen agit. Ammag cha fumatangan ano anat manlèna yag anat man-éhég way cha maim-imes ano gapo hen anchi nekaman way nafib-iliyan cha aggama an chagga isonga wachan inissana. Yachi yag inumchah ano iggaw po-ong yag hemhemmàna way man-améh unna anat omanamot. Yachi wat pommassong ano way man-améh ah selay yag nawéy ano hen utotna yag nafanotfot ano hen utotna yag nàtad ad char-ém anchi po-ong hen agub hen utotna wat ammag nafuttowan ano amin way wacha hen hiyachi way po-ong way wacha-ay aggama, gachiw, chagga, chayap, ancha chalet wat ammag cha manalep anoh selay ah laylayadna te chuar hen issana. Yachi wat ammag kamanay ag-agaw ano way chanadchi hen inissa-issan selay.
Anggaychi.
