Ad namenghan ano, wachan hen-ahawa way cha Angnganay an Gabfawa. Hen-argawan ano way manfayu ah Gabfawa, iniggana ah Aginnaya way anàna hen anchi takkoy yag chan fab-ayu. Maid innilana yag émméy ano anchi chakar way utot an Aginnaya yag ekatnén, “Chochochochot wino ta abfata.” Yag ekat ano Aginnayaén, “ Innà te annayan hen chotchotno.” Yachi yag henépchotat ano utot hen chotchot hen échégna. Yag ekatna ano agéén, “Chochochochot wino ta abfata,” “Innà te annayan imengno,” way ekat ano agé Aginnaya. Yachi yag nan-ehépchot ano agé utot anchi imengna yag ekatna ano agén, “Chochochochot wino ta abfata.” “Innà te annayan hen iposno” way ekat ano agé Aginnaya. Yachi yag ginétlangna ano anchi iposna. Yachi ano yag ekatna kasenén, “Chochochochot wino ta abfata,” Yachi yag nanpa-abfa anoh Aginnaya an utot wat enlayawna yag inyéyna ahchi takap. Yag angkay ano inumchahcha hen anchi orob utot, umipat ah Aginnaya. Yag annaat ano kaufan wat chummakar anchi abfotna wat inighépna ah Aginnaya.
Angkay ano nadhém, ekat ano Aginnayaén, “Nokagén anê lawa nò?” Yachi yag émméy anoh utot way ummara ah etlog, yag ininitna yag yachi anon empanganna an Aginnaya.
Angkay ano pommawéy, émméy ummarah utot ah gotteteng yag henangragna ano yag enhapodna yag chakarat agé way am-ammay way faréy. Yachi yag ekatna anowén, “Yato hen manfaréyno Aginnaya.” “Okaỳ” way ekat ano eman Aginnaya.
Angkay ano ah Gabfawa, hen anchi nanég-ahana hen finayuna, chana ano anapén anchi anàna te annag langrang-én yag maid ah Aginnaya iggaw takkoy. Chana ano ekatén, “Nokay ngatan émméyan anà-o anchi?” Yachi yag chana ano ana-anapén hen anchi pengetna yag maid. Yachi yag chan agongaong ano way mankela. Yag angkay ano hommàyat ah Angnganay way ahawana, ekatna anowén, “Pakay an-ag chan kelakela?” “Natarà umpay anchi uttengta ad anad” way ekat ano Gabfawa. “Nokay chillun enkakammanno?” “Empapattùchù hen annay takkoy yag chà manfayu yag anggay hen émméyà nantépan yag mamfangachà yag maid.” Yag ekat ano ahawanén, “Yag miid lawa innilam ah nanlooh ah tatagu?” “Maid aya” way ekat ano Gabfawa. “Aho ngay lawà? Way ekat Angnganay, “Maid met agé” way ekatna ano. “Wat nokagé lawan nangara nò?” way ekat agé Angnganay. Yag ekat agé Gabfawaén, “Tawwén umpay, anoy lawan anào anchi.” Yachi yag chana etoroy ano way mankela. Yachi yag chacha ano ana-anapén,chacha ano ana-anapén yag an chillug maid.
Angkay ano agéh utot, ommenta-éd amin ah ayyuchan Aginnaya hen guwis anchi awayan way akayyang. Hen-argawan ano way tempon ahyamma, i nan-amma cha Angnganay an Gabfawa iggaw payawcha ad Olèlepan. Hemhemà ano Angnganay way éméy manganop, wat wacha anon innaranay ugha. Yag ah Aginnaya agé émméy nan-ayyuchan iggaw ayyuchanna yag ekatna anowén,”Hachuya, hachuya, cha ama an ina way chachan amma hen payawni ad Olèlepan, Hachuya,hachuya, cha ama an ina émméy nanganop ah ama yag iggayà paat adchan.” Chechengngar ano Angnganaychi, yag ekatna anowén, “Henomanha?” “Pakay?” way ekat ano ahawanay Gabfawa, “Aẁ, wachan cha melenglengaw way chan éng-éngngé-éng way chachangrê.” “Tawwan kagé, maid met changrê” way ekat agé ano Gabfawa.
Angkay ano nawakas agé, hommepotcha yag umat agé way wacha chillu hen cha melenglengaw way chachangrên Angnganay. Ammag kamanay ag-agaw ano way no omanamotcha Angnganay way hen-ahawa way mangan hen manggawa, chachangrén Angnganay anchi cha mangal-aleyén, “Hachuya, hachuya cha ama an ina way chacha issan ugha way enanpan ama yag achiyà paat adchan.” Ekat ano Angnganayén, “Ay nganan noman ngataha?” An-anog éméy inumaan Angnganay anchi gaat hen payawcha ngém achicha maila anchi onga no mifawéy ah apet ahchi payaw anchi ayyuchanna yachi hen mangaryana way mamagngar.
Angkay ano tegangay manènad cha Angnganay, ekatna anowén, “Ay nganan fùnag-a no heno-a way pakay an-ag chan angé-angéy” ekatna ano. Yag maid ano fùnag.
Yachi ano yag kasen émméy nanganop ah Angnganay yag anchi ano lafang way ahona hen entàtaenna. Yachi ano yag ammag lenabten anonchi aho hen orpon hen ugha yag entatangngarna ano yag chana elemoh hen gaat ad chaya. Yachi yag anat ano unuchun Angnganay yag tég-angay ano umchah ah Angnganay hen anchi faréy ngém ammag takap. Yag ini-ilana ano way ammag enhàfan anchi aho annadchi anchi laman ngém inighép at peet ano anchi aho ah faréy ngém an maid ilan Angnganay. Angkay ano nanfangad anchi aho an Angnganay,chana ano ekatén, “Chokkay ninyéyam lafang anchi laman?” Yachi yag chan inge-ingeh ano anchi aho yag intuwilina anchi takap ngém maid ilan Angnganay uray no tuwiliyéna anchi cha isinyar hen aho.
Angkay ano agé ah Aginnaya, ekatna ano an aponay utotén, “Apo, wino ta abrawénta antoy awà way laman way inyalen anchi ahoni way lafang.” “Nokay nangil-ana hen antoy faréyta?” way ekat ano utot. “Tawwén kagé” way ekat ano Aginnaya. Yachi yag ommanamot ano eman ah utot wat enabrawcha ano way hen-apo anchi laman wat nanganangancha ano yag anchaat masséy.
Angkay nawakas ano, émméy chillu agé nan-ayyuchan ah Aginnaya yag yachi ano chillu hen chana aryé-aryén way ammag chan hachuhachuya. Yachi yag ekat ano Angnganayén, “Heno ay ngatan én-énnén hena way ekatna? Éméyà éggay ta iyà ilan anchi laman way ammag enhàfan lafang ad ugga.” Yachi yag émméy ano tot-owa yag maid anchi laman yag fufurong anchi maila way maid met agé faréy. Annaat ano ammag itùchu yag cha anon kela. Ekatna anowén, “No yato hen iggawno mampàila-an haén” way ekatna ano. Nappég anoh Angnganay yag lommayaw.
Angkay nawakas ano agé, wacha ano chillu anchi chan hachuhachuya te émméy kasen nanganop ah Angnganay, wat innarana agén ihay ugha. Yachi yag kasen ano entangar lafang way ahocha hen orpo yag chana agé etagtag way mangényéy iggaw ninyéyana ad ugga. Yachi ano wat nenetnod anoh Angnganay yag inumchahcha ano iggaw pongar hen lunu yag enfalletang anchi aho anchi laman. Yachi wat inighépat peet anchi aho ah faréy Aginnaya ngém an anchi mailan Angnganay. Yachi yag anat ano ammag itùchun Angnganay annadchi way chan-ale-ale way chan pangngapangnga-ase. Yachi yag an-anog wachan nan-ale way mangaliyén, “Innowat ayagan ah ina ta ahton iggawantaaw.” Naégyay ano ah Angnganay yag katuwituwili ngém maid inilana ah tatagu yag ekatna anowén, “Nokagén kaman paat chan ale anchi?” Yag kasenat ano nan-ale way empegwanay mangaliyén, “Innowa ayagan ah ina ama ta ahto hen inggawantaaw amin.” “Ay heaha Aginnaya?” way ekatna ano, “Oo ama, wat in-aat umpay ayagan ah ina.” Yachi ano wat ammag imfiwang Angnganay way managtag way I minfaga an ahawana way wacha ah Aginnaya iggaw takap.
Yachi yag enag-aggagcha ano way henomrà iggaw anchi péppég hen gaat yag ammag am-ammayat ano way charan way mantorong iggaw chakar way faréy yag chaat ano gumhad ah Aginnaya way chaat fumarasang. Chan kela ano ah inana way namàwar yag ekat ano Aginnayén, “Achia chan kela ina te amma-ammayà kayyà yag no hénggéptaaw ah faréy, achiyu kay paat cha pakpakén ah apo no ilanyu.”
Angkay ano hinénggépcha, ammag am-ammay anoy térén ah faréy yag nammamayuktot ano eman ah utot. Yachi yag ekatcha anowén, “Chuud anchi apom way cham ekat?” “Annayan kay yà” katna ano yag chan lumilumi ano eman ah utot. Yachi ano wat ammag naradsak anchi hen-ahawa te inchahancha anchi natarà way anàcha.
Yachi ano yag anat istoryéén utot hen enkamannay nangara an Aginnaya. Ekatna anowén, “Hen gagarà way nangara antoy onga te maid mangimfaréy antoy faréy-o no matéyà ya maid mangila hen antochay animar-o.” Yachi hen ekatna te ammag chuar anoy fafuyna,ancha manòna, ya luwangna wat maid anugu mangen-awa amin anchanadchi.
Yachi ano wat hen chacha anén way hen-apo wat ammag pahig etlog yag manò, ancha fafuy hen chacha issa. Wat uray ano achicha cha mangan ah isna.
Wat manepod ano hen hiyachi wat nì-iggaw anchichay chinàcha-ar Aginnaya ahchi way anchag naradsaradsak ingganah natéy ah utot.
Anggaychi.
